Behin baino gehiagotan bueltaka ibili gara mintegian sozietate anonimoaren laburtzapenaren inguruan: SA edo S.A. Gutxienez mintegikide batzuontzat, ez zegoen argi laburdura ala sigla ote zen. Lehendabiziko kasuan, "sozietate anonimo" esan eta puntua idatzi beharko litzateke. Bigarren kasuan, ordea, "ese a" esan eta punturik gabe idatziko genuke. Azkenean, ustez, siglaren aldeko apustua egin genuen mintegian (oker banago zuzendu).
Aitzitik, lehengoan irakurri nuen gaztelaniaz "S.A." sigla ez baizik laburdura zela Manual de Español Urgente webgunean, zehazki kontsulten atalean. Kontsiderazio hori dela eta, laburduraren azpian dauden hitzak bere horretan esan behar dira ("sociedad anónima") eta ez, ordea, "ese a". Idaztean, "S.A." erabili behar da, hortaz.
Gauzak horrela, euskarazko laburtzapenaren kasuan, agian merezi du mintegian berriro aztertzea. Horrela eginez gero, erabaki beharko genuke sigla izaerari eusten diogun ala laburduratzat hartzen dugun.
Irizpidea, besteak beste, beste sozietate mota batzuetarako ere baliagarria da.
---
Mikel Azkarate
1 comment:
Ikusi dut Fundeuk laburtzapentzat jotzen dituela, baina ni ez nago oso seguru.
Uste dut arazoak badituela beste koska batzuk, kontuan hartu beharrekoak:
- Enpresa izen askok SA hori jasotzen du amaieran, emaitza osoa sigla izan gabe nahitaez. Adibide modroa dago: Aparcaguisa, Asisa, Metrovacesa...
- Beste askotan, enpresaren izena sigla da, eta SA du amaieran, adibidez: Rumasa, TISA eta beste hamaika.
- Enpesaren izenaren atzetik S.C.A. ikusita, inork irakurriko al luke behar bezala? Nori otuko zaio sociedad comanditaria por acciones izan daitekeela?
- Laburtzapenen erabidea oso librea da, egia da hori, baina badira halako jarraibide orokor batzuk, besteak beste, laburtzapenak nahiago izaten du silabaren erdian eta kontsonantean moztea (art., etab.). Normalagoa litzateke, horretaz, Soc. Anón. edo gisako zerbait.
Labur esanda, iruditzen zait enpresa motaren izendapen laburtu hori siglaren antza handiagoa du, laburtzapenaren baino.
Gotzon
Post a Comment